વાદળાં ગરજશે અને વરસાદ વરસશે હવામાન વિભાગની વરસાદને લઈને મોટી આગાહી હજી એક રાઉન્ડ બાકી - khabarilallive    

વાદળાં ગરજશે અને વરસાદ વરસશે હવામાન વિભાગની વરસાદને લઈને મોટી આગાહી હજી એક રાઉન્ડ બાકી

રાજ્યમાં અત્યાર સુધી સરેરાશ 100 ટકા વરસાદ વરસી ગયો છે, ત્યારે આગામી દિવસોમાં વરસાદને લઇને હવામાન વિભાગની આગાહી સામે આવી છે. જે અનુસાર, આગામી પાંચ દિવસ દરમિયાન સામાન્ય વરસાદ રહેવાની સંભાવના છે. 5 દિવસ દરિયા કાંઠાના વિસ્તારોમાં વરસાદ રહેશે. હાલ ભારે વરસાદની શકયતા નહિંવત જોવા મળી રહી છે. ઉપરાંત અમદાવાદમાં હળવા વરસાદની આગાહી કરવામાં આવી છે.

હવામાન વિભાગની આગાહી અનુસાર, આગામી પાંચ દિવસમાં સમગ્ર ગુજરાતમાં માત્ર હળવા વરસાદની સંભાવના છે. સૌરાષ્ટ્ર-કચ્છમાં 48 કલાક સામાન્ય વરસાદની સંભાવના છે, જે બાદ ઉઘાડુ નીકળશે. નોર્થ ગુજરાત રિઝનમાં પણ આગામી બે દિવસ હળવો વરસાદ પડી શકે છે, જે બાદ દક્ષિણ ગુજરાતમાં આ દરમિયાન હળવા વરસાદની સંભાવના છે.

અમદાવાદમાં વરસાદની વાત કરીએ તો, આજે અને કાલે અમુક વિસ્તારોમાં વરસાદ પડી શકે છે. પરંતુ સમગ્ર શહેરમાં વરસાદ પડવાની સંભવના નથી. અમદાવાદમાં રવિવારથી વરસાદની આગાહી નથી. જ્યારે તાપમાનની વાત કરીએ તો એક બે દિવસ બાદ 34-35 સેલ્સિયસ રહેવાની શક્યતા છે.

રાજ્યમાં અત્યાર સુધી સરેરાશ 100 ટકા વરસાદ વરસી ગયો છે. જેમાં સૌથી વધારે વરસાદ કચ્છમાં પડ્યો છે. કચ્છમાં 155.89 ટકા, ઉત્તર ગુજરાતમાં 110.42 ટકા, મધ્ય-પૂર્વ ગુજરાતમાં 82.75 ટકા, સૌરાષ્ટ્રમાં 89.50 ટકા અને દક્ષિણ ગુજરાતમાં 108.40 ટકા વરસાદ પડ્યો છે.

સરોવર નર્મદા ડેમની પાણીની આવકમાં સતત ઘટાડો નોંધાયો છે. નદીમાં છોડવામાં આવતા પાણીમાં 2,50,000 ક્યુસેકનો ઘટાડો કરાયો છે. હવે 23 ગેટ માત્ર 0.60 મીટર ખોલી 1,00,000 ક્યુસેક પાણી જ છોડાઇ રહ્યું છે. Rbphમાંથી 45,000 ક્યુસેક પાણી છોડવામાં આવશે. જ્યારે નદીમાં જાવક 1,45,000 ક્યુસેક રહેશે.

બીજી તરફ મહેસાણા જિલ્લામાં આવેલા ધરોઈ ડેમને 621 ફૂટ સુધી ભરવાનો નિર્ણય લેવાયો છે. ખેડૂતોના હિતમાં ડેમને રૂલ લેવલથી વધુ ભરવાનો નિર્ણય લેવાયો છે. સામાન્ય રીતે ઓગસ્ટ માસમાં 619 ફૂટ રૂલ લેવલ જાળવવાનું હોય છે, જ્યારે હવે રૂલ લેવલ કરતા વધારે બે ફૂટ પાણી ભરવાનો નિર્ણય કરાયો છે.

ઉપરવાસમાં ઓછો વરસાદ થતા વહીવટી તંત્ર દ્વારા આવો નિર્ણય લેવાયો છે. હાલ ધરોઈ ડેમમાં 1 દરવાજો 3 ફૂટ ખુલ્લો રખાયો છે. ડેમમાં 20,421 ક્યુસેક આવક સામે 5,838 ક્યુસેક પાણીની જાવક થઈ રહી છે. ડેમની ડેમની ભયજનક જળ સપાટી 622 ફૂટ છે. હાલ ડેમ 619.78 ફૂટ સુધી ભરાયેલો છે. બીજી રીતે જોઈએ તો ડેમમાં 91.28 ટકા પાણીનો જથ્થો સંગ્રહાયેલો છે.

Leave a Reply

Your email address will not be published. Required fields are marked *