આ જિલ્લામાં 2 કલાકમાં 4 ઇંચ વરસાદ ખાબકતા ખેડૂતના ચેહરા ખુશખુશાલ જુઓ તમારા વિસ્તારના શું છે હાલ

રાજ્યમાં સત્તાવાર ચોમાસાનો શુભઆરંભ થઈ ગયો છે. વરસાદે ગુજરાતમાં એન્ટ્રી કરતાની સાથે સૌરાષ્ટ્ર , દક્ષિણ અને ઉત્તર ગુજરાતના કેટલાક જિલ્લાઓમાં વાવણી લાયક પાણી તો પુરુ પાડી દીધુ છે. પરંતુ કેટલાક જિલ્લાઓ અને તાલુકાઓ એવા છે જેના ખેડૂતો હજુ પણ વરસાદની વાટ જોઈને બેઠા છે. ત્યારે આવો જોઈએ વરસાદની પહેલી ઈનિંગનો લાભ રાજ્યમાં ક્યાં ક્યાં થયો છે

ચીખલીમાં બે કલાકમાં ચાર ઈંચ વરસાદ
નવસારી જિલ્લાના ચીખલી તાલુકામાં ધોધમાર વરસાદ વરસી રહ્યો છે.ખૂંધ સહિતના અનેક વિસ્તારોમાં બે કલાકમાં ચાર ઈંચ વરસાદ ખાબક્યો હતો.વાવણી લાયક વરસાદ આવતા ખેડૂતોમાં હરખની હેલી પણ વહી છે. આ તરફ સૌરાષ્ટ્રમાં દ્વારકાના કલ્યાણપુર તાલુકામાં ગાજવીજ સાથે વરસાદ પડયો હતો.જામરાવલમાં મોડી સાંજે પવનના સુસવાટા સાથે મેઘ મહેર થઈ છે.

માંગરોળમાં તોફાની પવનથી નુકસાન
તો બીજી તરફ જૂનાગઢના માંગરોળમાં તોફાની પવનથી ભયંકર નુકસાન થયું છે. બંદર રોડ પર આવેલ કંપનીઓમાં લાખોની વખરી પવનને કારણે નાશ પામી છે.ફાઇબર કંપનીઓમાં બનતી બોટ અને ફર્મા તૂટી પડ્યા છે.

રાજ્યમાં વરસાદની બેટિંગ શરૂ થઈ ગઈ છે. ત્યારે શરૂઆતમાં મેઘાએ સૌરાષ્ટ્રના અનેક જિલ્લાઓમાં મહેર વરસાવી છે. છેલ્લા ચોવીસ કલાકની વાત કરીએ તો રાજ્યના 98 તાલુકાઓમાં વરસાદ વરસ્યો છે. જેમાં સૌરાષ્ટ્રની વાત કરીએ તો રાજકોટ, જૂનાગઢ, ભાવનગર, અમરેલી, સાવરકુંડલા, ગોંડલ , પોરબંદરના સહિતના ગ્રામ્ય વિસ્તારોમાં મનમુકીને વરસાદ વરસ્યો છે. જેનાથી ખેડૂતોમાં ખુશીનો માહોલ છવાયો છે. વાવણી લાયક વરસાદ વરસવાથી ખેડૂતો ખેતીના કામમાં જોતરાયા છે. 

ક્યાં કેટલો વરસ્યો વરસાદ ? (રાત્રે 8 વાગ્યા સુધી)
જૂનાગઢના માણાવદરમાં 2.5 ઈંચ વરસાદ, ખાંભામાં પોણા 3 ઈંચ, રાણાવાવમાં સવા 2 ઈંચ વરસાદ, સાવરકુંડલામાં 2 ઈંચ, ગીર ગઢડામાં પોણા 2 ઈંચ વરસાદ, કવાંટમાં 1.5 ઈંચ, કુતિયાણામાં 1.5 ઈંચ વરસાદ, બોડેલીમાં સવા ઈંચ, પોરબંદરમાં સવા ઈંચ વરસાદ, નખત્રાણામાં સવા ઈંચ, મહુવામાં 1 ઈંચ વરસાદ, વડિયામાં 1 ઈંચ, ખંભાતમાં 1 ઈંચ વરસાદ ખાબક્યો

કયાં વરસી શકે છે વરસાદ ?
હજુ તો ચોમાસું બેઠું જ છે. ક્યાંક મહેર તો છે ક્યાંક હજુ કોરું કટ છે. ત્યારે આવો જાણીએ હવામાન વિભાગે રાજ્યમાં વરસાદને લઈને શું આગાહી કરી છે. આગામી બે દિવસ દક્ષિણ ગુજરાતમાં ભારે વરસાદ વરસી શકે છે. સુરત, વલસાડ, નવસારી, તાપી, ડાંગમાં અતિભારે વરસાદની આગાહી કરવામાં આવી છે.

સૌરાષ્ટ્રમાં પણ ભારે વરસાદ પડી શકે છે. જૂનાગઢ, રાજકોટ, પોરબંદર, અમરેલી, ભાવનગર, ગીર સોમનાથ, મોરબીમાં ભારે વરસાદ પડવાની આગાહી કરી છે. આગામી દિવસોમાં વરસાદી સિસ્ટમ સક્રિય થશે. જેનાથી અમદાવાદ, ગાંધીનગર સહિતના મધ્ય ગુજરાતમાં સામાન્ય વરસાદ રહેવાની સંભાવના વ્યક્ત કરવામાં આવી છે.